சென்னை:
சென்னை நகரின் மக்கள் தொகையை கருத்தில் கொண்டு, சென்னை அருகே ‘சாட்டிலைட்’ நகரம் அமைக்க தமிழக அரசு திட்டமிட்டுள்ளது. நவீன வசதிகள் கொண்ட இந்த நகரத்தை சென்னை அருகே உள்ள செங்கல்பட்டில் அமைக்க தமிழக அரசு திட்டமிட்டுள்ளது. சுமார் 500 முதல் 1000 ஹெக்டேர் பரப்பளவில் இதை அமைக்கலாம் என்று முடிவு செய்யப்பட்டிருக்கிறது.
சென்னை பெருநகர வளர்ச்சி குழுமத்திடம் அரசு இதுபற்றி கருத்து கேட்டுள்ளது. இதற்கான வரைவு திட்டத்தை தயாரிக்கும்படி அரசு கேட்டுள்ளதாகவும் அதிகாரிகள் வட்டாரம் தெரிவித்தது.
இந்த திட்டத்தின்படி சாட்டிலைட் நகரம் சென்னை பெருநகரத்தின் துணை நகரமாக அமையும். கிராமப்புற மக்களின் முன்னேற்றத்துக்கும் பயன்படும். எனவே இந்த பகுதியில் உள்ள விவசாயிகள், நில உரிமையாளர்களின் ஒத்துழைப்பு தேவை.
எனவே நிலம் வழங்கும் விவசாயிகள் மற்றும் நில உரிமையாளர்களிடம் இருந்து நிலத்தை கையகப்படுத்துவது எவ்வாறு என்பது குறித்து ஆலோசனை நடந்து வருகிறது. இதன்படி நில உரிமையாளர்களுக்கு மாற்று தொழில், வாரிசுகளுக்கு அரசு வேலை போன்றவற்றை வழங்க உறுதி அளிக்க வேண்டும். நிலத்துக்கு தகுந்த விலை வழங்க வேண்டும் என்று ஆலோசனை வழங்க அதிகாரிகள் திட்டமிட்டுள்ளனர்.
1000 ஹெக்டேரில் சாட்டிலைட் நகரம் அமைக்கும் திட்டம் இருந்தாலும் முதல் கட்டமாக 500 ஹெடேரில் இந்த நகரத்தை அமைக்கலாம். இதன் மூலம் கிராமப்புற மக்களும் பொருளாதார வளர்ச்சி பெறுவார்கள். சென்னை நகரின் மக்கள் தொகை நெருக்கடியை குறைக்கவும் இது பயன்படும்.
இங்கு மக்களுக்கு தேவையான, நவீன வசதிகளுடன் தகவல் தொடர்பு, சாலை, புதிய தொழில்கள், கல்வி, மருத்துவம் உள்பட அனைத்து வசதிகளும் செய்து கொடுக்கவும் திட்டமிடப்பட்டுள்ளது. இதற்கு வசதியான நிலங்களை தேர்வு செய்ய திட்டமிடப்பட்டுள்ளது. சென்னை பெருநகர வளர்ச்சி குழுமம் இந்த திட்டத்துக்கான ஆய்வை நடத்தி அரசிடம் தெரிவிக்கும். அதன் அடிப்படையில் செங்கல்பட்டு பகுதியில் சேர்ட்டிலைட் நகரம் உருவாக்குவது குறித்து அரசு இறுதி முடிவு எடுக்கும் என்று அதிகாரிகள் தெரிவித்தனர்.
